ADINI

Adını axar sular verdilər

Durmadan axsın dedilər!

Adını günəbaxanlar verdilər

Günəşlə olsun dedilər!

Adını ağaclar verdilər

Fəsillərlə nəfəs alsın dedilər!

Adını çiçəklər verdilər

Öz qoxusu olsun dedilər!

Adını gecələr verdilər

Qaranlıqlarına dalsın dedilər!

Adını göylər verdilər

Sonsuzlara açılsın dedilər!

Adını yağışlar verdilər

Yaşıllıq daşısın dedilər!

Adını ölmüş sevənlər verdilər

Bizi də yaşasın dedilər!